Akan fɔnɛtese ne fɔnɔlɔgyi (Akan phonetics and phonology)

Saa nwoma yi ho abɛhia ɛfiri sɛ mpɛn dodoɔ no ara adesuafoɔ ne akyerɛkyerɛfoɔ hwehwɛ nwoma a ɛfa Akan fɔnɛtese ne fɔnɔlɔgyi adesua ho a yɛatwerɛ no wɔ Akan (Twi) kasa mu ho. Ne titire ne adesuafoɔ ne akyerɛkyerɛfoɔ a wɔwɔ Asuapɔn a Wɔtete Akyerɛkyerɛfoɔ Colleges of Education ahodoɔ mu a wɔresua Akan (Twi) kasa a ɛnam so bɛma wɔn nsa aka abodin krataa Bachelor of Education (Early Grade/Upper Primary/JHS options). Ɛnam sɛ yɛde Colleges yinom abata Asuapɔn atitire binom te sɛ University of Cape Coast, University of Education, Winneba, University of Ghana, Kwame Nkrumah University of Science and Technology ne University for Development Studies no nti, akɔhia sɛ Colleges of Education ahodoɔ a ɛhyɛ Ghana Aban ase no nyinaa mu akyerɛkyerɛfoɔ no nya nteteɛ korɔ (Professional Development Sessions) ansa na adesua berɛ (semester) no ahyɛ aseɛ sɛdeɛ ɛbɛyɛ a wɔbɛtumi de adesua akyerɛkyerɛkwan nwoma Manual a Aban ama yɛayɛ ama wɔn no bɛtete adesuafoɔ. Mpɛn pii no akyerɛkyerɛfoɔ yi ara wɔtete adesuafoɔ yi hyia wɔProfessional Development Sessions yinom ase a na nsɛmpɔ atitire (key terms) korɔ anaa nteaseɛ korɔ a ɛsɛ sɛ wɔnya wɔadesuadeɛ bi te sɛ fɔnɛtese ne fɔnɔlɔgyi ho no ho asɛm ayɛ den pa ara. Ne saa nti na ɛho abɛhia sɛ yɛka yɛn tiri bom na yɛto yɛn bo ase kyerɛkyerɛ Akan fɔnɛtese ne fɔnɔlɔgyi adesua no nkorabata mu yie na aboa ama adesuafoɔ ne akyerɛkyerɛfoɔ a wɔresua Akan (Twi) ate saa adesuadeɛ yi ase yie. Yɛato yɛn bo afa nsɛntitire a ɛwowɔ Ghanaian languages Manual no mu na yɛde atwerɛ saa nwoma yi. Ɛyɛ yɛn awerɛhyɛmu sɛ nwoma yi bɛboa ama adesuafoɔ ne akyerɛkyerɛfoɔ ate Akan fɔnɛtese ne fɔnɔlɔgyi ase yie na ama ne sua no ayɛ mmrɛ asan nso ayɛ anika. Ɛnyɛ adesuafoɔ ne akyerɛkyerɛfoɔ a wɔwɔ Colleges of Education nko ara na wɔbɛhia nwoma yi. adesuafoɔ a wɔwɔ Asuapɔn ahodoɔ yɛkyerɛAkan wɔ hɔ a wɔresua Akan fɔnɛtese ne fɔnɔlɔgyi nso yɛgye di sɛ nwoma yi bɛyɛ ama wɔn pa ara. Sɛ wohwɛ nwoma yi mu a, yɛde nsɛntitire bi nso aka ho a yɛgye di sɛ adesuafoɔ a wɔresua biribi afa Akan fɔnɛtese ne fɔnɔlɔgyi ho de apɛ abodin Master’s nso sɛ wɔkenkan nwoma yi a ɛbɛboa wɔn. Yɛahyɛda atwe saa adesuafoɔ yi adwene asi mmeaeɛ ahodoɔ a ɛsɛ sɛ wɔhwɛ ne nwoma nkaeɛ a ɛsɛ sɛ wɔkenkan na aboa wɔn nteaseɛ wɔ saa nsɛntitire no mu. Sɛyɛka yeinom nso a na yɛgye di bio nso sɛ ɛnam sɛ yɛato yɛn bo ase akyerɛkyerɛ nsɛntitire binom mu nti, adesuafoɔ a wɔwɔ gyinapɛn nkaeɛ no mu bi nso bɛtumi akenkan nwoma yi ama no aboa wɔn. Yɛakyekyɛ nwoma yi mu akɔ Ti (Chapters) ahodoɔ du (10) mu. Ti no mu biara wɔ afa (sections) ahodoɔ ɛna ɔfa biara nso wɔ ɔfa kumaa (sub-section). Yɛabɔ mmɔden sɛ ɔfa biara awieeɛ no yɛama adesuani dwuma a ɔbɛdi ama no aboa ne nteaseɛ a ɔbɛnya wɔ saa ɔfa no mu. Bio, ɛnam sɛ yɛatwerɛ nwoma yi wɔ Twi mu na yɛnim sɛ Twi wɔ nkorabata atitire a yɛsua mmienu a ɛyɛ Asante ne Akuapem nti, yɛatwerɛ ahodoɔ no wɔ Asante ne Akuapem mu. Deɛ yɛayɛ ne sɛ, sɛ wofa Ti biara, ɛmu afa ahodoɔ no mu bi wɔ Asante mu ɛna ebi nso wɔ Akuapem mu. Yɛahwɛ sɛ yɛamfa Asante ne Akuapem amfrafra wɔ ɔfa bi mu. Ɛwom sɛ yɛatwerɛ nwoma yi wɔ Twi mu deɛ, nanso nhwɛsoɔ ahodoɔ no wɔ Akan kasa no nkorabata atitire mmiɛnsa a ɛyɛ Akuapem, Asante, ne Mfante mu.